បុគ្គលិក​ធ្វើការ​ក្រុមហ៊ុនក្នុង​ក្រុង បើ​ចង់​ឆ្លង​ស្ពាន​ច្បារ​អំពៅ​មិន​ស្ទះ នេះ​ម៉ោងពេល​ត្រូវ​ដឹងទាំង​ព្រឹក​និង​ល្ងាច

125

ដោយ​តែ​ខណ្ឌ​ច្បារអំពៅ​នៅ​កៀកក្រុងជាង​ខណ្ឌដទៃ​ហើយ​ក៏​ជា​តំបន់​មាន​សក្តានុពលពិសេស​​ផ្នែក​អចលនទ្រព្យ ទើប​ធ្វើ​ឱ្យ​ដង់ស៊ីតេ​ប្រជាជន​នៅ​ទីនេះ​ច្រើន​កកកុញ។ ដូច្នេះ​ហើយ​ទើប​ពលរដ្ឋ​ពិសេស​បុគ្គលិក​បម្រើការ​តាម​ស្ថាប័ន​និង​ក្រុមហ៊ុន​នានានៅ​កណ្តាល​ក្រុង តែង​រអ៊ូ​និង​ឈឺក្បាល​រឿង​ស្ទះណែនណាន់តាន់តាប់ទៅ​មុខ​សឹង​មិនរួច​រៀងរាល់ព្រឹកនិង​ល្ងាច​ចាប់ពីចំណុច​បុរី ប៉េង ហួត​បឹងស្នោរ ផ្លូវ ២៧១ ត្រង់ច្រមុះជ្រូក និង​ផ្លូវ​នរោត្តម។ ​

ជា​ដំណោះ​ស្រាយ​បណ្តោះអាសន្ន​មុន​ពេលមាន​ស្ពានបន្ថែម​ដើម្បី​រំដោះការ​កក​ស្ទះ ពលរដ្ឋ​ពិសេស​បុគ្គលិក​បម្រើការ​តាម​ក្រុមហ៊ុនឬ​ស្ថាប័ន​នានា អាច​លៃ​ពេលចេញ​ដំណើរ​ទៅធ្វើការ​ពេល​ព្រឹក​ត្រឹម​ម៉ោង ៧.០០ នាទីចុះ​ក្រោមយ៉ាង​យូរ​ ឬ​បើ​ព្រលឹម​ជាង​នេះ​កាន់តែ​ល្អ ព្រោះ​សភាព​ចរាចរណ៍នៅ​រលូនខ្លះ តែ​បើ​ហ៊ាន​ចេញ​ដំណើរ​ពីម៉ោង ៧.៣០ ព្រឹក​នាទី​ឡើង​ នោះ​នឹង​ត្រូវ​ស្អុះស្អាប់ធុញធប់​ដោយ​សារ​ហិត​ផ្សែងឡានម៉ូតូផង​ក្តៅផងនិង​​ជិះ​​គើមៗសឹង​តែ​មិន​ទៅ​មុខ​ថែម​ទៀត ហើយ​តែ​ពេលល្ងាចត្រឡប់មកវិញគួរ​ធ្វើ​ដំណើរ​នៅម៉ោងប្រហែល ៧ កន្លះ​ទៅ ៨ យប់ ទើប​ស្ថានភាព​រាងធូរស្រាល។

យ៉ាង​ណា​មិញ​ ពលរដ្ឋ​អាច​សារ៉េ​ម៉ោង​ពេល​ធ្វើ​ដំណើរ​តាម​ការ​គួរ​ជាក់ស្តែងអាស្រ័យ​លើ​ស្ថានភាព​ផ្ទាល់​ខ្លួន ហើយ​អ្វី​ដែល​រៀបរាប់​ខាង​លើ​គឺ​ជា​ពេលវេលា​ទូទៅ ដែល​ក្រុមការងារធ្លាប់ឆ្លង​កាត់ផ្ទាល់​រាល់ថ្ងៃ៕

Loading...