Home កម្សាន្តទូទៅ អាជ្ញាធរ​ឥណ្ឌូនេស៊ី​ទទូច​ឲ្យ​សាច់ញាតិផ្តល់ DNA ស្រួល​កំណត់អត្តសញ្ញាណជន​រងគ្រោះ​ធ្លាក់យន្តហោះ​

អាជ្ញាធរ​ឥណ្ឌូនេស៊ី​ទទូច​ឲ្យ​សាច់ញាតិផ្តល់ DNA ស្រួល​កំណត់អត្តសញ្ញាណជន​រងគ្រោះ​ធ្លាក់យន្តហោះ​

175

ក្រុម​អ្នក​ជួយ​​រុករក​និង​ជួយសង្គ្រោះ​របស់​ឥណ្ឌូនេស៊ីនៅ​ព្រឹក​ថ្ងៃ​អាទិត្យទី ១០ មករា ឆ្នាំ ២០២១ បាន​ទទូច​ឲ្យ​ក្រុម​គ្រួសារ​ជន​រងគ្រោះ​ដែល​ធ្វើ​ដំណើរ​​តាម​យន្តហោះ Boeing 737-500 ដឹក​អ្នកដំណើរសរុប ៦២ នាក់ ផ្តល់​នូវ DNA របាយការណ៍សុខភាពវិជ្ជសាស្រ្ត​ ដើម្បី​ឲ្យ​ដំណើរការ​​កំណត់អត្តសញ្ញាណ​ជនរងគ្រោះ​កាន់តែ​លឿន​។

ការ​អំពាវ​នាវ​ដូច្នេះ​ក្រោយ​ក្រុម​អ្នក​ជួយ​​រុករក​និង​ជួយសង្គ្រោះ​បាន​អះអាង​ថា ​យន្តហោះ Boeing 737-500 ពិត​ជា​បាន​ធ្លាក់ចូល​សមុទ្រ​ពិត​មែន បន្ទាប់​ពី​​រក​ឃើញ​បំបែក​យន្តហោះ​មួយ​ចំនួន​នៅ​ក្នុង​សមុទ្រ។

តាម​ការ​បញ្ជាក់​របស់​អាជ្ញាធរ​ឥណ្ឌូនេស៊ី យន្តហោះ​ប្រភេទ Boeing 737-500 របស់​ក្រុមហ៊ុន Sriwijaya Air មាន​អាយុកាល ២៦ ឆ្នាំ ដោយ​បាន​ចាកចេញពីអាកាសយានដ្ឋានទីក្រុងហ្សាការតា ឆ្ពោះ​ទៅចុះចតនៅអាកាសយានដ្ឋាន Pontianak ស្ថិតនៅក្នុងខេត្ត Kalimantan ភាគខាងលិច​ប្រទេស តែ​ត្រូវ​បាត់ដំណឹងនៅ​ម៉ោង ២:៤០នាទីរសៀល (ម៉ោងឥណ្ឌូនេស៊ី) ខណៈ​ពេល​ហោះនៅរយៈកម្ពស់ ៣ គីឡូម៉ែត្រ​លើអាកាស។

ពាក់ព័ន្ធ​រឿងប្រភេទ​យន្តហោះ Boeing 737​ នេះ ពិភពលោក​ធ្លាប់​បាន​ខ្លាច​រអារ​ជា​ខ្លាំង ដោយ​កាល​ពីឆ្នាំ ២០១៨ យន្តហោះ​របស់ Boeing 737 ជើងហោះហើរ​លេខ Flight 610 របស់​ក្រុមហ៊ុនឥណ្ឌូនេស៊ី Lion Air បាន​ធ្លាក់ចូល​សមុទ្រ​ ដោយ​បាន​សម្លាប់​មនុស្ស ១៨៩ នាក់។ បន្ទាប់ពី​នោះ​ប៉ុន្មាន​ខែពោល​គឺ​នៅ​ឆ្នាំ ២០១៩ យន្តហោះ Boeing 737 ជើងហោះហើរ​លេខ Flight 302 របស់​ប្រទេស​អីត្យូពៀរ បានធ្លាក់និង​សម្លាប់​មនុស្សលើ​យន្តហោះ ១៥៧ នាក់។ ហេតុការណ៍​នេះ ត្រូវ​បាន​រាយការណ៍​ថា​សុទ្ធ​តែកើតឡើង​មកពីកំហុស​ប​ច្ចេកទេស​នៃប្រព័ន្ធ​បញ្ជា​របស់​យន្តហោះ ដោយ​បញ្ជា​ឲ្យ​ក្បាល​យន្តហោះ​ដាំក្បាល​ចុះ​ខុសប្រក្រតីគ្រប់គ្រង​លែង​បានរហូត​ដល់ធ្លាក់តែម្តង​៕

Loading...